ଲୋକସଭା ନିର୍ବାଚନ ପାଇଁ କେନ୍ଦ୍ର ବିଜେପି ପକ୍ଷରୁ ସୋମବାର ଇସ୍ତାହାର ପତ୍ର ଜାରି କରିଛି। ଦିଲ୍ଲୀ ବିଜେପି ମୁଖ୍ୟ କାର୍ଯ୍ୟାଳୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହ ଇସ୍ତାହାର ଜାରି କରିଛନ୍ତି।

ଏହି ଅବସରରେ ଅର୍ଥମନ୍ତ୍ରୀ ଅରୁଣ ଜେଟଲୀ, ବୈଦେଶିକ ମନ୍ତ୍ରୀ ଉପସ୍ଥିତ ରହିଥିଲେ। ବିଜେପିର ସଂକଳ୍ପ ପତ୍ର ୪୮ ପୃଷ୍ଠାର ରହିଛି। ଏହି ସଂକଳ୍ପ ପତ୍ରର ନାମ "ସଂକଳ୍ପିତ ଭାରତ, ସଶକ୍ତ ଭାରତ" ରଖାଯାଇଛି।

"୬ କୋଟି ଲୋକଙ୍କ ସହାୟତାରେ ପ୍ରସ୍ତୁତ ହୋଇଛି ବିଜେପିର ସଂକଳ୍ପ ପତ୍ର। ବିଶ୍ୱ ଅର୍ଥନୀତିରେ ଭାରତ ତୃତୀୟ ସ୍ଥାନରେ ରହିବ", କହିଛନ୍ତି ଗୃହମନ୍ତ୍ରୀ ରାଜନାଥ ସିଂହ।

୨୦୨୨ ସୁଦ୍ଧା ୭୫ଟି ସଂକଳ୍ପ ପୂରଣ ହେବ ବୋଲି ଏହି ଅବସରରେ କହିଛନ୍ତି ଶାହ।

ଜାଣନ୍ତୁ, ବିଜେପିର ଇସ୍ତାହାରରେ କ'ଣ ରହିଛି ପ୍ରତିଶ୍ରୁତି?

ରାଜ୍ୟ କଂଗ୍ରେସ ପକ୍ଷରୁ ଆଜି ନିର୍ବାଚନୀ ଇସ୍ତାହାର ପ୍ରକାଶ ପାଇଛି। ଏଥିରେ ଦଳ ଦରିଦ୍ର, ଚାଷୀ, ଯୁବକ, ମହିଳା ଓ ଆଦିବାସୀଙ୍କୁ ଗୁରୁତ୍ୱ ଦେଇଛି। ନିର୍ବାଚନୀ ଇସ୍ତାହାର ଅନୁଯାୟୀ, ଦଳ ରାଜ୍ୟରେ ସରକାର ଗଢ଼ିଲେ ଗରିବଙ୍କୁ ୬ ହଜାର ଟଙ୍କାର ଆୟର ଗ୍ୟାରେଣ୍ଟି ଦେବ। ଏହି ୬ ହଜାର ଟଙ୍କା ଘରର ମହିଳା ସଦସ୍ୟଙ୍କ ଆକାଉଣ୍ଟରେ ରହିବ। ଦଳ ପ୍ରତିଶ୍ରୁତି ଦେଇଛି, ପ୍ରତି ପରିବାରର ଯୁବକଙ୍କୁ ସରକାରୀ କିମ୍ବା ବେସରକାରୀ ଚାକିରି ଯୋଗାଇ ଦେବାର ବ୍ୟବସ୍ଥା କରାଯିବ। ଚାକିରି ନ ମିଳିବା ଯାଏ ଯୁବକମାନଙ୍କୁ ମାସିକ ୩ ହଜାର ଟଙ୍କାର ବେକାରୀ ଭତ୍ତା ପ୍ରଦାନ କରାଯିବ।

ପ୍ରଦେଶ କଂଗ୍ରେସର ସଭାପତି ନିରଞ୍ଜନ ପଟ୍ଟନାୟକ, ଇସ୍ତାହାର କମିଟିର ଅଧ୍ୟକ୍ଷ ଗଣେଶ୍ୱର ବେହେରା ପ୍ରଭୃତି ନେତୃବୃନ୍ଦ ଇସ୍ତାହାର ପୁସ୍ତିକା ଉନ୍ମୋଚନ କରିଥିଲେ। ଗରିବ, ଚାଷୀ, ମହିଳା, ଆଦିବାସୀ ଓ ଯୁବକମାନେ ଉପକୃତ ହେବା ଉପରେ ଇସ୍ତାହାରରେ ଗୁରୁତ୍ୱ ଦିଆଯାଇଥିବା କଥା ପ୍ରଦେଶ କଂଗ୍ରେସ ସଭାପତି ନିରଞ୍ଜନ ପଟ୍ଟନାୟକ କହିଛନ୍ତି।

ଚାଷୀମାନଙ୍କ ପାଇଁ ୨ ଲକ୍ଷ ଟଙ୍କା ଯାଏଁ ଋଣ ଛାଡ଼ କରାଯିବ। ପୂର୍ବରୁ ଋଣ କରି କେତେକ କିସ୍ତି ଶୁଝି ସାରିଥିବା ଚାଷୀଙ୍କୁ ସେହି ଅର୍ଥ ପୁଣି ଫେରସ୍ତ ଦିଆଯିବ। ଅନ୍ୟାନ୍ୟ ଚାଷ ପାଇଁ ୩ ବର୍ଷ ଯାଏଁ ୧୦ ହଜାର ଟଙ୍କା ଲେଖାଏଁ ଆର୍ଥିକ ସହାୟତା ମିଳିବ। ମହିଳା ଚାଷୀଙ୍କୁ ମାଗଣାରେ ସମସ୍ତ କୃଷି ଉପକରଣ ଯୋଗାଇ ଦିଆଯିବ। ଧାନ କିଣିବା ଲାଗି ସହାୟକ ରାଶି କୁଇଣ୍ଟାଲ୍‌ ପିଛା ୨୬୦୦ ଟଙ୍କା କରାଯିବ। ସ୍ୱାମୀ ନାରାୟଣ କମିଟି କରିଥିବା ଅନୁମୋଦନକୁ ଗ୍ରହଣ କରାଯିବ।

ଦ୍ୱାଦଶ ଯାଏଁ ମହିଳାମାନଙ୍କୁ ମାଗଣା ଶିକ୍ଷା। ମହିଳାମାନଙ୍କ ବୈଷୟିକ ଶିକ୍ଷା ପାଇଁ ସରକାରୀ କଲେଜରେ ମାଗଣା ଶିକ୍ଷାଦାନ। ବାହାଘର ସମୟରେ ମହିଳାଙ୍କୁ ଆର୍ଥିକ ସହାୟତା ମିଳିବ। ମହିଳାମାନଙ୍କ ନାମରେ ଥିବା ସମସ୍ତ ମାମଲା ପ୍ରତ୍ୟାହାର କରି ନିଆଯିବ।

ବାର୍ଦ୍ଧକ୍ୟ ପେନ୍‌ସନ୍‌ ୧୫୦୦ ଟଙ୍କା ଦିଆଯିବ। ବିଧବା ଓ ଅସହାୟ ପେନ୍‌ସନ୍‌ ରାଶି ୨୦୦୦ ଟଙ୍କା କରାଯିବ। ୭୦ ବର୍ଷରୁ ଅଧିକ ବୟସ୍କ ନାଗରିକଙ୍କୁ ମଧ୍ୟ ୨୦୦୦ ଟଙ୍କା ବାର୍ଦ୍ଧକ୍ୟ ଭତ୍ତା ମିଳିବ। ସମସ୍ତ ପ୍ରାଥମିକ ଓ ଗୋଷ୍ଠୀସ୍ୱାସ୍ଥ୍ୟ କେନ୍ଦ୍ରରେ ସବୁ ପ୍ରକର ନିଦାନ, ଅସ୍ତ୍ରୋପଚାର ଆଦି ମାଗଣାରେ କରାଯିବ।

ଜାତି ଧର୍ମ ଆଧାରରେ ଭୋଟ ପାଇଁ ବହୁଜନ ସମାଜ ପାର୍ଟି (ବିଏସପି) ସୁପ୍ରିମୋ ଉତ୍ତର ପ୍ରଦେଶ ଦେୱବନ୍ଦ ରାଲିରେ ନିବେଦନ କରିବା ପରେ ନିର୍ବାଚନ କମିସନ (ଇସି) ଏହାକୁ ଗୁରୁତ୍ବର ସହ ନେଇଛି। ସାହରଣପୁର ଜିଲ୍ଲା ମାଜିଷ୍ଟ୍ରେଟଙ୍କୁ ମାୟାବତୀଙ୍କ ଅଭିଭାଷଣ ବାବଦରେ ଇସି ରିପୋର୍ଟ ମାଗିଛନ୍ତି । ତେବେ ମାୟାବତୀଙ୍କ ଅଭିଭାଷଣର କେଉଁ ଅଂଶଟି ନିର୍ବାଚନ ଆଚରଣ ବିଧି ଉଲ୍ଲଂଘନ କରୁଛି ସେ ନେଇ ନିର୍ବାଚନ କମିସନ ସ୍ପଷ୍ଟ କରିନାହାନ୍ତି।

ସୂଚନାଯୋଗ୍ୟ ଗତକାଲି ପଶ୍ଚିମ ଉତ୍ତର ପ୍ରଦେଶର ଦେୱବନ୍ଦରେ ଏସପି-ବିଏସପି-ଆରଏଲଡି ଏକାଠି ହୋଇ ମିଳିତ ରାଲି କରୁଥିଲେ। ଏହି ସମୟରେ ଉତ୍ତର ପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ମାୟାବତୀ କହିଥିଲେ କଂଗ୍ରେସ ବିଜେପି ସହିତ ଲଢ଼ିଲେ ପାରିବ ନାହିଁ। ତେଣୁ ସମସ୍ତ ମୁସଲିମ ସମାଜ ସମାଜବାଦୀ ପାର୍ଟି-ବହୁଜନ ସମାଜ ପାର୍ଟି -ରାଷ୍ଟ୍ରୀୟ ଲୋକତାନ୍ତ୍ରିକ ଦଳର ମିଳିତି ପ୍ରାର୍ଥୀକୁ ଭୋଟ ଦେବା ପାଇଁ ଅପିଲ କରିଥିଲେ ମାୟାବତୀ। ଏମିତିକି ଭୋଟ ଯେମିତି ଭାଗ ଭାଗ ନହୋଇଯାଏ ସେଥିପାଇଁ ମଧ୍ୟ ମୁସଲିମ ସମାଜକୁ ନିବେଦନ କରିଥିଲେ ବିଏସପି ସୁପ୍ରିମୋ।

ଧର୍ମ ଓ ଜାତି ଆଧାରରେ ଭୋଟ ପାଇଁ ମାୟାବତୀ ନିବେଦନ କରିଥିବାରୁ ନିର୍ବାଚନ କମିସନ ଏହାକୁ ନିର୍ବାଚନ ଆଚରଣ ବିଧି ଉଲ୍ଲଂଘନ ହୋଇଥିବା ମନେ କରି ଜିଲ୍ଲା ନିର୍ବାଚନ ଅଧିକାରୀଙ୍କୁ ରିପୋର୍ଟ ମାଗିଛନ୍ତି।

ପଶ୍ଚିମ ଉତ୍ତର ପ୍ରଦେଶର ଦେୱବନ୍ଦରେ ମୁସଲିମ ଓ ଦଳିତ ଭୋଟରଙ୍କ ସଂଖ୍ୟା ଅଧିକ । ୨୦୧୭ ବିଧାନସଭା ଓ ୨୦୧୪ ସାଧାରଣ ନିର୍ବାଚନରେ ମୁସଲିମ ଓ ଦଳିତ ଭୋଟର ୮ଟି ଯାକ ଲୋକସଭା ଓ ବିଧାନସଭା ପାଇଁ ବିଜେପିକୁ ଭୋଟ ଦେଇଥିଲେ। ଏହାପରେ ୨୦୧୮ରେ ଏକ ଉପନିର୍ବାଚନରେ ଏସପି-ବିଏସପି ସମର୍ଥନରେ ଆରଏଲଡ଼ିର ପ୍ରାର୍ଥୀ ଜିତିବା ପରେ ଏବେ ୩ ଜଣ ମିଶି ପଶ୍ଚିମ ୟୁପିର ମୁସଲିମ-ଦଳିତଙ୍କ ଭୋଟ ନେବା ପାଇଁ ମହାମେଣ୍ଟ ଉଦ୍ୟମ କରୁଛି।

ମାଆ ମେନକା ଗାନ୍ଧିଙ୍କ ପରେ ପୁଅ ବୁରଣ ଗାନ୍ଧି ରାହୁଲ ଗାନ୍ଧିଙ୍କ ପ୍ରଧାନମନ୍ତ୍ରୀ ଆଶାକୁ ନେଇ ସମାଲୋଚନା କରିଛନ୍ତି। ପିଲିଭିଟ ଲୋକସଭା ଆସନରୁ ଭାରତୀୟ ଜନତା ପାର୍ଟିର ସାଂସଦ ପ୍ରାର୍ଥୀ ହୋଇଥିବା ବରୁଣ ଗାନ୍ଧି ନିର୍ବାଚନୀ ରାଲିରେ ପ୍ରଧାନମନ୍ତ୍ରୀଙ୍କୁ ଭୂୟସୀ ପ୍ରଶଂସା କରିଛନ୍ତି। ତାଙ୍କର ପରିବାର ନାହିଁ ତେଣୁ ସେ କାହା ପାଇଁ ଦୁର୍ନୀତି କରି ଟଙ୍କା ରଖିବେ ବୋଲି ବରୁଣ କହିଛନ୍ତି।

ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧିଙ୍କ ନାତି ବରୁଣ ଗାନ୍ଧି ନିଜ ପରିବାର ବାବଦରେ ଉଦାହରଣ ଦେବାକୁ ଯାଇ କହିଛନ୍ତି ଅନେକ ପ୍ରଧାନମନ୍ତ୍ରୀ ଆମ ପରିବାରରୁ ହୋଇଛନ୍ତି। ହେଲେ ନରେନ୍ଦ୍ର ମୋଦିଙ୍କ ଭଳି ପ୍ରଧାନମନ୍ତ୍ରୀ ଦେଶକୁ ଯେଉଁ ଗୌରବ ଓ ପରିଚୟ ସାରା ଦୁନିଆରେ ଦେଇଛନ୍ତି ତାହା ଦେଶ ପାଇଁ ଗର୍ବର କଥା ବୋଲି ବରୁଣ କହିଛନ୍ତି।

ପୂର୍ବତନ ପ୍ରଧାନମନ୍ତ୍ରୀ ସ୍ବର୍ଗତ ଅଟଳ ବିହାରୀ ବାଜପେୟୀ ସାଧାରଣ ପରିବାରରୁ ଆସି ପ୍ରଧାନମନ୍ତ୍ରୀ ହେବାରେ ସଫଳ ହୋଇଛନ୍ତି। ସେହିପରି ନରେନ୍ଦ୍ର ମୋଦି ଆର୍ଥିକ ସ୍ବଚ୍ଛଳ ନଥିବା ଏକ ପରିବାରରୁ ଆସି ଦେଶକୁ ସ୍ବତନ୍ତ୍ର ପରିଚୟ ଦେବାରେ ସଫଳ ହୋଇଛନ୍ତି ବୋଲି ପିଲିଭିଟ ଆସନର ବିଜେପି ପ୍ରାର୍ଥୀ କହିଛନ୍ତି।

ଚଳିତଥର ସୁଲତାନପୁରର ବିଜେପି ସାଂସଦ ନିଜ ମାଆ ମେନକା ଗାନ୍ଧି ଲଢ଼ୁଥିବା ପିଲିଭିଟ ଆସନରୁ ପ୍ରାର୍ଥୀ ହୋଇଥିବାବେଳେ ସୁଲତାନପୁରର ସାଂସଦ ପ୍ରାର୍ଥୀ ହୋଇଛନ୍ତି ମେନକା ଗାନ୍ଧି। ପିଲିଭିଟରେ ଏପ୍ରିଲ ୨୩ ତାରିଖରେ ତୃତୀୟ ପର୍ଯ୍ୟାୟ ମତଦାନ ରହିଛି।

କିଛି ଦିନ ତଳେ ମେନକା ଗାନ୍ଧି ମଧ୍ୟ ରାହୁଲ ଗାନ୍ଧିଙ୍କ ପ୍ରଧାନମନ୍ତ୍ରୀ ହେବା ନେଇ ପ୍ରତିକ୍ରିୟା ରଖିଥିଲେ। ସେ କହିଥିଲେ ଯଦି ସେମିତି କିଛି ନହୁଏ ତାହେଲେ ରାହୁଲ ପ୍ରଧାନମନ୍ତ୍ରୀ ହୋଇପାରିବେ ନାହିଁ। ଝିଆରୀ ପ୍ରିୟଙ୍କା ଗାନ୍ଧିଙ୍କର କୌଣସି ପ୍ରଭାବ ନାହିଁ ବୋଲି କହିଥିବାବେଳେ ଏସପି-ବିଏସପି-ଆରଏଲଡି ମେଣ୍ଟକୁ କଡ଼ା ସମାଲୋଚନା କରିଥିଲେ।

୨୦୧୪ ସାଧାରଣ ନିର୍ବାଚନ ବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଲୋକପ୍ରିୟତା ଶୀର୍ଷରେ ଥିଲା। ଭାଜପା ନେତୃତ୍ୱାଧୀନ ଏନ୍‌ଡିଏ ସରକାରକୁ ଦେଶର ଭୋଟର ୫ ବର୍ଷ ପରଖିବା ପରେ ମୋଦିଙ୍କ ଆକର୍ଷଣ ଫିକା ପଡ଼ିଯାଇଥିଲା। ଏଭଳି ସମୟରେ ପୁଲଓ୍ବାମା ଆକ୍ରମଣ ଓ ବାଲାକୋଟ ପ୍ରତିଆକ୍ରମଣ ତାଙ୍କ ପାଇଁ ଆଶୀର୍ବାଦ ପାଲଟିଛି। ଲୋକନୀତି ପକ୍ଷରୁ କରାଯାଇଥିତ୍ବା ସଦ୍ୟ ସର୍ବେକ୍ଷଣ ଏହାର ପ୍ରମାଣ ଦେଉଛି। ଅନ୍ୟପକ୍ଷରେ ସାଧାରଣ ନିର୍ବାଚନରେ ମୋଦିଙ୍କ ବିଜୟ ସୁନିଶ୍ଚିତ କରିବା ପାଇଁ କେନ୍ଦ୍ର ସରକାର ପୁଲଓ୍ବାମା ଆକ୍ରମଣକୁ ଅନୁମତି ଦେଇଥିଲେ ବୋଲି ଜମ୍ମୁ-କଶ୍ମୀର ପୂର୍ବତନ ମୁଖ୍ୟମନ୍ତ୍ରୀ ଫାରୁକ୍‌ ଅବ୍‌ଦୁଲ୍ଲା ରବିବାର ସାଂଘାତିକ ଅଭିଯୋଗ ଆଣିଛନ୍ତି। ସେହିପରି ମୋଦି ସରକାର ପାକିସ୍ତାନ ଉପରେ ଏପ୍ରିଲ ୧୬ରୁ ୨୦ ତାରିଖ ମଧ୍ୟରେ ଆଉ ଏକ ଆକ୍ରମଣ କରିବା ପାଇଁ ଯୋଜନା କରୁଛନ୍ତି ବୋଲି ଇସ୍‌ଲାମାବାଦ ଅଭିଯୋଗ ଆଣିବା ପରେ ବିବାଦୀୟ ପରିସ୍ଥିତି ସୃଷ୍ଟି ହୋଇଛି।

ଫେବୃୟାରୀ ୧୪ରେ ପୁଲଓ୍ବାମା ଆକ୍ରମଣ ପରେ ୨୬ ତାରିଖରେ ପାକିସ୍ତାନର ଖାଇବରପାଖ୍‌ତୁନ୍‌ଖ୍ବାସ୍ଥିତ ବାଲାକୋଟର ଜୈଶ୍‌ ଆତଙ୍କବାଦୀ ଶିବିର ଉପରେ ଭାରତୀୟ ବାୟୁସେନା ଏୟାର ଷ୍ଟ୍ରାଇକ୍‌ କରିଥିଲା। ଏହା ପରେ ଭାରତରେ ମୋଦି ହାଓ୍ବାର ପ୍ରବାହ ବୃଦ୍ଧି ପାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ୩ଟି ନିଷ୍ପତ୍ତି ସାଧାରଣ ନିର୍ବାଚନର ଫଳାଫଳକୁ ପ୍ରଭାବିତ କରିପାରେ ବୋଲି ନୂଆଦିଲ୍ଲୀସ୍ଥିତ ସେଣ୍ଟର ଫର୍‌ ଷ୍ଟଡି ଅଫ୍‌ ଡେଭଲପିଙ୍ଗ୍‌ ସୋସାଇଟିଜ୍‌ରେ ଲୋକନୀତି ପକ୍ଷରୁ କରାଯାଇଥିବା ଗବେଷଣା କାର୍ଯ୍ୟକ୍ରମରୁ ଜଣାପଡ଼ିଛି। ପ୍ରାକ୍‌ ନିର୍ବାଚନୀ ସର୍ବେକ୍ଷଣ ରିପୋର୍ଟରେ କୁହାଯାଇଛି ଯେ, ଆତଙ୍କବାଦୀ ଶିବିର ଉପରେ ପ୍ରତିଆକ୍ରମଣ, ଉଚ୍ଚବର୍ଗର ଆର୍ଥିକ ଅସ୍ବଚ୍ଛଳ ବର୍ଗଙ୍କୁ ଶିକ୍ଷା ଓ ନିଯୁକ୍ତିରେ ସଂରକ୍ଷଣ ଏବଂ ପିଏମ୍‌-କିଷାନ ଯୋଜନାରେ ଚାଷୀଙ୍କୁ ବାର୍ଷିକ ୬ ହଜାର ଟଙ୍କା ପ୍ରଦାନ ନିଷ୍ପତ୍ତି ମୋଦିଙ୍କୁ କ୍ଷମତାକୁ ପୁଣିଥରେ ଫେରିବା ପାଇଁ ବାଟ ଫିଟାଇଛି। ମୋଦି ପୁନଃ କ୍ଷମତାସୀନ ହୁଅନ୍ତୁ ବୋଲି ଦେଶର ୪୩% ମତଦାତା ଚାହାନ୍ତି। ୨୦୧୪ ଲୋକ ସଭା ନିର୍ବାଚନ ତୁଳନାରେ ୨୦୧୯ ଭୋଟ ମହାପର୍ବ ବେଳେ ମୋଦିଙ୍କ ଲୋକପ୍ରିୟତା ୭% ବୃଦ୍ଧି ପାଇଛି। ଦେଶର ୨୯ ରାଜ୍ୟ ମଧ୍ୟରୁ ୧୯ଟିର ୧୦,୦୧୦ ମତଦାତାଙ୍କୁ ନେଇ ଗତ ମାର୍ଚ୍ଚ ୨୪ରୁ ୩୧ ମଧ୍ୟରେ କରାଯାଇଥିବା ପୋଲ୍‌ ସର୍ଭେରେ ଏହି ବିଷୟ ସାମ୍ନାକୁ ଆସିଛି।

ସେପଟେ ପାକିସ୍ତାନର ମୁଲତାନରେ ଏକ ଖବରତାଦା ସମ୍ମିଳନୀକୁ ସମ୍ବୋଧିତ କରି ସେଠାକାର ବହିର୍ବ୍ୟାପାର ମନ୍ତ୍ରୀ ଶାହ ମେହମୁଦ୍‌ କୁରେଶୀ ରବିବାର କହିଛନ୍ତି, ପାକିସ୍ତାନ ଉପରେ ଭାରତ ଆଉ ଏକ ଆକ୍ରମଣ କରିବା ପାଇଁ ନୂଆ ଯୋଜନା କରୁଛି। ଏପ୍ରିଲ ୧୬-୨୦ ତାରିଖ ମଧ୍ୟରେ ଭାରତ ଆକ୍ରମଣ କରିପାରେ ବୋଲି ପାକିସ୍ତାନର ବିଶ୍ୱସ୍ତ ଗୋଇନ୍ଦା ରିପୋର୍ଟ ଆଧାରରେ ସେ ଏହି ଦାବି କରିଛନ୍ତି। ଭାଜପା ନିର୍ବାଚନକୁ ଦୃଷ୍ଟିରେ ରଖି ଯୁଦ୍ଧ ଉନ୍ମାଦ ସୃଷ୍ଟି କରୁଛି ବୋଲି ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ୍‌ ଖାନ୍‌ ଅଭିଯୋଗ ଆଣିବାର ଦିନକ ପରେ କୁରେଶୀଙ୍କ ପକ୍ଷରୁ ଏହି ମନ୍ତବ୍ୟ ଆସିଛି।

ଇତିମଧ୍ୟରେ ନ୍ୟାଶନାଲ କନ୍‌ଫରେନ୍ସ (ଏନ୍‌ସି) ଅଧ୍ୟକ୍ଷ ଫାରୁକ୍‌ ଅବ୍‌ଦୁଲ୍ଲାଙ୍କ ବିବାଦୀୟ ମନ୍ତବ୍ୟ ମୋଦି ସରକାରଙ୍କ ପାଇଁ ଅଡୁଆ ସ୍ଥିତି ସୃଷ୍ଟି କରିଛି। ଶ୍ରୀନଗର ଲୋକ ସଭା ଆସନରୁ ନିର୍ବାଚନ ଲଢ଼ୁଥିବା ଫାରୁକ୍‌ ରବିବାର କହିଛନ୍ତି, ପୁଲଓ୍ବାମାରେ ଆତଙ୍କବାଦୀ ଆକ୍ରମଣ ହେବ ବୋଲି କେନ୍ଦ୍ର ସରକାର ସମ୍ପୂର୍ଣ୍ଣ ଭାବେ ଅବଗତ ଥାଇ ଏହାକୁ ଅନୁମତି ଦେଇଥିଲେ। ଆକ୍ରମଣରେ ବ୍ୟବହୃତ ବିସ୍ଫୋରକ କେଉଁଠୁ ଆସିଥିଲା? ମୋଦିଙ୍କୁ ନିର୍ବାଚନ ଜିତିବାକୁ ଅଛି ବୋଲି ସେ ଏହି 'କାରନାମା' କରାଇଛନ୍ତି। ପୁଲଓ୍ବାମା ଆକ୍ରମଣରେ ୪୯ ଯବାନ ଶହୀଦ ହୋଇଥିବାରୁ ଆଗକୁ ଏଭଳି ଘଟଣାକୁ ଏଡାଇବା ଲାଗି ଜମ୍ମୁ-ଶ୍ରୀନଗର ରାଜପଥରେ ସପ୍ତାହକୁ ଦୁଇଦିନ (ରବିବାର ଓ ବୁଧବାର) ସାଧାରଣ ପରିବହନକୁ ବନ୍ଦ କରାଯାଇଛି। ଯାନବାହନ ଚଳାଚଳ ବାତିଲ ପ୍ରତିବାଦରେ ଏନ୍‌ସି ପକ୍ଷରୁ ଦିଆଯାଇଥିବା ଧାରଣାରେ ବସିଥିବାବେଳେ ଫାରୁକ୍‌ ଉପରୋକ୍ତ ଅଭିଯୋଗ ଆଣି ଜାତୀୟ ରାଜନୀତିରେ ଭୂକମ୍ପ ସୃଷ୍ଟି କରିଛନ୍ତି। ଅନ୍ୟପକ୍ଷରେ ପାକିସ୍ତାନର ଦାବିକୁ ଭାରତ ପକ୍ଷରୁ ଖଣ୍ଡନ କରାଯାଇଛି। ଯୁଦ୍ଧ ଉନ୍ମାଦ ସୃଷ୍ଟି କରିବା ଉଦ୍ଦେଶ୍ୟରେ କୁରେଶୀ ଏଭଳି ଦାୟିତ୍ୱହୀନ ଓ ନିରର୍ଥକ ମନ୍ତବ୍ୟ ଦେଇଛନ୍ତି ବୋଲି ଭାରତର ବହିର୍ବ୍ୟାପାର ମନ୍ତ୍ରଣାଳୟ ମୁଖପାତ୍ର ରବୀଶ କୁମାର କହିଛନ୍ତି।

ବିଜେପିର ଜଣେ କର୍ମୀ , ଅଭିନେତ୍ରୀ ଏବଂ ମୁମ୍ୱାଇ ଉତ୍ତର ନିର୍ବାଚନୀ ମଣ୍ଡଳୀର କଂଗ୍ରେସ ପ୍ରାର୍ଥୀ ଉର୍ମିଳା ମାତୋଣ୍ଡକରଙ୍କ ଉପରେ ହିନ୍ଦୁ ବିରୋଧୀ ଟିପ୍ପଣୀ ଦେଇଥିବା ଅଭିଯୋଗ କରି ପୁଲିସରେ ଅଭିଯୋଗ ରୁଜୁ କରିଛନ୍ତି । ଜଣେ ଅଧିକାରୀ ରବିବାର ଦିନ ଏହି ସୂଚନା ଦେଇଛନ୍ତି । ମୁମ୍ୱାଇରେ ବିଜେପି କର୍ମୀ ସୁରେଶ ନଖୁଆ ଅଭିଯୋଗରେ କହିଛନ୍ତି ଯେ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ କଥିତ ରୁପରେ ଉର୍ମିଳାଙ୍କୁ ହିନ୍ଦୁ ବିରୋଧୀ ଟିପ୍ପଣୀ ଦେବାକୁ ନିର୍ଦେଶ ଦେଇଥିଲେ ଏବଂ ପତ୍ରକାର ଜଣକ ତାଙ୍କୁ ତାଙ୍କ ଚେନାଲେରେ ଏହି ଟିପ୍ପଣୀ କରିବାକୁ ଦେଇଥିଲେ ।

ସେ ରାହୁଳ ଗାନ୍ଧୀଙ୍କ ବିରୋଧରେ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି । ସୁରେଶ ପୋବ ପୁଲିସ ଷ୍ଟେସନରେ ଏହି ଅଭିଯୋଗ କରିଛନ୍ତି । ଟିଭି ଚାନେଲରେ ଉର୍ମିଳାଙ୍କ ସାକ୍ଷାତକାର ଦେଖିବା ପରେ ନଖୁଆ ଏହି ମାମଲା ରୁଜୁ କରିଛନ୍ତି । ଉର୍ମିଳା ହିନ୍ଦୁ ଧର୍ମକୁ ଦୁନିଆର ସବୁଠାରୁ ବଡ ହିଂସ୍ର ଧର୍ମ ବୋଲି କହିଥିବା ସେ ଅଭିଯୋଗ କରିଛନ୍ତି ।

ପୁଲିସର ଜଣେ ଅଧିକାରୀ ସୂଚନା ଦେଇ କହିଛନ୍ତି ଯେ, ଆମ ପାଖରେ ଏନେଇ ଅଭିଯୋଗ ଅଛି ,ଏହାର ବିରୋଧରେ କାର୍ଯ୍ୟନୁଷ୍ଠାନ ଗ୍ରହଣ କରିବୁ ।

ଏସ୍‌ଆଇଟି ଦ୍ୱାରା ଚିଟ୍‌ଫଣ୍ଡ୍ ଠକେଇର ତଦନ୍ତ କରାଯିବ। ଚିଟ୍‌ଫଣ୍ଡ୍ କ୍ଷତିଗ୍ରସ୍ତଙ୍କୁ ଟଙ୍କା ଫେରସ୍ତ କରାଯିବ। ତା'ସହିତ ଚିଟ୍‌ଫଣ୍ଡ ଠକଙ୍କୁ କଠୋରରୁ କଠୋର ଦଣ୍ଡ ଦିଆଯିବ। ରାଜ୍ୟ ବିଜେପି ତା' ନିର୍ବାଚନୀ ଇସ୍ତାହାର 'ସଂକଳ୍ପ ପତ୍ର'ରେ ଏମିତି ପ୍ରତିଶ୍ରୁତି ଦେଇଛି।

ଆଜି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହଙ୍କ ଉପସ୍ଥିତିରେ ରାଜ୍ୟ ବିଜେପି ତା'ର ନିର୍ବାଚନୀ ଇସ୍ତାହାର ଉନ୍ମୋଚନ କରିଥିଲା। ଏଥିରେ କୁହାଯାଇଛି, ରାଜ୍ୟରେ ଦଳ କ୍ଷମତାକୁ ଆସିଲେ ଆୟୁଷ୍ମାନ ଯୋଜନା ଲାଗୁ କରାଯିବ। ପ୍ରଧାନମନ୍ତ୍ରୀ କିଷାନ ଯୋଜନାକୁ ମଧ୍ୟ ଲାଗୁ କରାଯିବ।

ରାଜ୍ୟ ବିଜେପି 'ସଂକଳ୍ପ ପତ୍ର'ରେ ଗରିବଙ୍କ ବିକାଶ ଉପରେ ଗୁରୁତ୍ୱ ଦେଇଥିବା ବେଳେ କ୍ଷମତାକୁ ଆସିଲେ ୩ ମାସ ମଧ୍ୟରେ ପେସା ଆଇନ ଲାଗୁ କରାଯିବ ବୋଲି କହିଛି। ତା'ସହିତ ଦୁଷ୍କର୍ମ ମାମଲାରେ ଦୋଷୀଙ୍କୁ ମୃତ୍ୟୁଦଣ୍ଡର ବ୍ୟବସ୍ଥା କରାଯିବ।

ଚାଷୀମାନଙ୍କୁ ବିନା ସୁଧରେ ଋଣ ଦିଆଯିବ ବୋଲି ଦଳ କହିଥିବା ବେଳେ ଶିଳ୍ପ, ଉତ୍ତମ ଶିକ୍ଷା ଓ ରୋଜଗାର ଉପରେ ବି ଗୁରୁତ୍ୱ ଦେଇଛି। ସେହିଭଳି ଆଦିବାସୀଙ୍କୁ ଜମିପଟ୍ଟା ଦିଆଯିବ।

ସେହିପରି ୨୦୨୨ ସୁଦ୍ଧା ସମସ୍ତଙ୍କୁ ଘର, ପାଣି ଓ ବିଜୁଳି ସହିତ ସ୍ୱାସ୍ଥ୍ୟ ସେବା ଯୋଗାଇ ଦିଆଯିବ ବୋଲି ଦଳ ପ୍ରତିଶ୍ରୁତି ଦେଇଛି।
ପୁରୀକୁ ଦେଶର ସାଂସ୍କୃତିକ ରାଜଧାନୀରେ ପରିଣତ କରାଯିବ ବୋଲି ଦଳ ନିର୍ବାଚନୀ ଇସ୍ତାହାରରେ ଘୋଷଣା କରିଛି। ଏହା ସହିତ ରାଜ୍ୟରେ ଭ୍ରଷ୍ଟାଚାର ଓ ଗୁଣ୍ଡାଗର୍ଦ୍ଦିକୁ ଖତମ କରାଯିବ ବୋଲି ଦଳ କହିଛି।

ସ୍ୱାସ୍ଥ୍ୟ ସେବାକୁ ଗୁରୁତ୍ୱ ଦେଇ ବିଜେପି ରାଜ୍ୟର ସବୁ ଜିଲ୍ଲାରେ ମେଡିକାଲ୍‌ କଲେଜ ପ୍ରତିଷ୍ଠା କରାଯିବ ବୋଲି କହିଛି। ଏହା ସହିତ ୫ଟି ହାଇଟେକ୍ ମେଡିକାଲ ସେଣ୍ଟର ମଧ୍ୟ ପ୍ରତିଷ୍ଠା କରାଯିବ ବୋଲି ପ୍ରତିଶ୍ରୁତି ଦେଇଛି।

ଏଥିରେ ଆହୁରି କୁହାଯାଇଛି ଯେ ବିଜେପି ସରକାର ଗଢ଼ିଲେ ୨ ବର୍ଷ ଭିତରେ ବେକାରୀଙ୍କୁ ଚାକିରି ମିଳିବ। ଏହା ସହିତ ୫ ବର୍ଷରେ ୨୦ ଲକ୍ଷ ପିଲାଙ୍କୁ ସ୍କିଲ ଡେଭଲପମେଣ୍ଟ ବା ଦକ୍ଷତା ବିକାଶ ତାଲିମ ପ୍ରଦାନ କରାଯିବ।

ନିର୍ବାଚନୀ ଇସ୍ତାହାର ଉନ୍ମୋଚନ ଅବସରରେ ଅମିତ ଶାହ ରାଜ୍ୟର ବିଜେଡି ସରକାରକୁ ଟାର୍ଗେଟ୍ କରିଥିଲେ। ସେ କହିଥିଲେ, ବିଜେଡିର ଶାସନ କଂଗ୍ରେସଠୁ ମଧ୍ୟ ନିକୃଷ୍ଟ। ଦୂରଦୃଷ୍ଟିର ଅଭାବ, ଆଳସ୍ୟ ଓ ଦୁର୍ନୀତି ଓଡ଼ିଶାକୁ ପତନ ଆଡ଼କୁ ନେଇଛି। ଖଣି ଓ ଚିଟ୍‌ଫଣ୍ଡ୍‌ ଦୁର୍ନୀତିରେ ସଂପୃକ୍ତ ନେତାଙ୍କୁ ଟିକେଟ ମିଳିଛି।

ଏହି ଅବସରରେ ଅନ୍ୟମାନଙ୍କ ମଧ୍ୟରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ରାଷ୍ଟ୍ରୀୟ ଉପ-ସଭାପତି ବୈଜୟନ୍ତ ପଣ୍ଡା,ରାଜ୍ୟ ପ୍ରଭାରୀ ଅରୁଣ ସିଂହ, ବରିଷ୍ଠ ନେତା ବିଶ୍ୱଭୂଷଣ ହରିଚନ୍ଦନ ଓ ବିଜୟ ମହାପାତ୍ର ପ୍ରମୁଖ ଉପସ୍ଥିତ ଥିଲେ। ବିଶ୍ୱଭୂଷଣ ହରିଚନ୍ଦନଙ୍କ ନେତୃତ୍ୱରେ ଗଠିତ ଇସ୍ତାହାର କମିଟି ତୃଣମୂଳସ୍ତରରେ ଲୋକଙ୍କ ମତାମତ ସଂଗ୍ରହ କରି ଏହି 'ସଂକଳ୍ପ ପତ୍ର' ପ୍ରସ୍ତୁତ କରିଛି।

ସୂଚନାଯୋଗ୍ୟ, ଆଜି ରାଜ୍ୟ କଂଗ୍ରେସ ବି ତା'ର ନିର୍ବାଚନୀ ଇସ୍ତାହାର ପ୍ରକାଶ କରିଛି।

-ବିଜେପି ଶାସନକୁ ଆସିଲେ ଓଡ଼ିଶାରେ ଆୟୁଷ୍ମାନ ଯୋଜନାକୁ ଲାଗୁ କରାଯିବ।

- ପ୍ରଧାନମନ୍ତ୍ରୀ କିଷାନ ଯୋଜନାକୁ ଓଡ଼ିଶାରେ ଲାଗୁ କରାଯିବ।

- ୫ ବର୍ଷରେ ଭୂମିହୀନଙ୍କୁ ଜମି ପଟ୍ଟା ପ୍ରଦାନ କରାଯିବ।

- ପୁଣିଥରେ ଚିଟଫଣ୍ଡ ଦୁର୍ନୀତିର ତଦନ୍ତ କରାଯିବ।

- ବିନା ସୁଧରେ ଚାଷୀଙ୍କୁ ଋଣ ଦିଆଯିବ।

- ଶିଳ୍ପ, ଉତ୍ତମ ଶିକ୍ଷା ଓ ରୋଜଗାର ଉପରେ ଗୁରୁତ୍ୱ ଦିଆଯିବ।

- ୨୦୨୨ ସୁଦ୍ଧା ସମସ୍ତଙ୍କୁ ଘର, ପାଣି, ସ୍ୱାସ୍ଥ୍ୟ ଓ ବିଜୁଳି ଯୋଗାଇ ଦିଆଯିବ।

- ପୁରୀକୁ ଦେଶର ସାଂସ୍କୃତିକ ରାଜଧାନୀରେ ପରିଣତ କରାଯିବ।

- ରାଜ୍ୟର ସବୁ ଜିଲ୍ଲାରେ ମେଡିକାଲ କଲେଜ ପ୍ରତିଷ୍ଠା କରାଯିବ।

- ବିଜେପି ସରକାର ଗଢିଲେ ୨ ବର୍ଷ ଭିତରେ ବେକାରୀଙ୍କୁ ଚାକିରି ମିଳିବ।

-୫ ବର୍ଷରେ ୨୦ ଲକ୍ଷ ପିଲାଙ୍କୁ ସ୍କିଲ ଡେଭଲଫମେଣ୍ଟ ପ୍ରଦାନ କରାଯିବ।

ସୁନ୍ଦରଗଡ଼ ପରେ ସୁବର୍ଣ୍ଣପୁରରେ ବି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସମାନ ଢଙ୍ଗରେ ବିଜେଡି ଏବଂ କଂଗ୍ରେସ ଉପରେ ବର୍ଷିଛନ୍ତି। ରାଜ୍ୟରେ କେବେ କଂଗ୍ରେସ ଏବଂ କେବେ ବିଜେଡି ସରକାର ରହିଛି। କିନ୍ତୁ ଏହି ଦୁଇ ଦଳ ଗରିବୀରେ ନିଜର ରାଜନୈତିକ ଫସଲ ବିକ୍ରି କରନ୍ତି। କଂଗ୍ରେସ ସମାଜରେ ଉଚ୍ଚନୀଚ୍ଚର ବିଷ ମଞ୍ଜି ବୁଣିଛି। କଂଗ୍ରେସକୁ ହଟାଇଲେ ଗରିବୀ ଆପେ ଆପେ ହଟିଯିବ। କଂଗ୍ରେସ ନ ହଟିବା ଯାଏ ଦେଶରୁ ଗରିବୀ ହଟିପାରିବ ନାହିଁ ବୋଲି ପ୍ରଧାନମନ୍ତ୍ରୀ ମୋଦୀ ସୁବର୍ଣ୍ଣପୁରରେ ଆୟୋଜିତ ବିଜେପିର ବିଜୟ ସଙ୍କଳ୍ପ ସମାବେଶରେ ମତ ଦେଇଛନ୍ତି।

ସମାବେଶ ଆରମ୍ଭରୁ ମୋଦୀ ଓଡ଼ିଆରେ ସମ୍ବୋଧନ ସହ ସୁବର୍ଣ୍ଣପୁରବାସୀଙ୍କୁ ଜୁହାର ବୋଲି କହିଥିଲେ। ସେ କହିଥିଲେ, ବାରାଣସୀ ଓ ସୁବର୍ଣ୍ଣପୁର ମଧ୍ୟରେ ବହୁ ସମାନତା ରହିଛି। ଉଭୟ ସହର ମନ୍ଦିରର ସହର। ଉଭୟ ସହର ପ୍ରତି ମହାପ୍ରଭୁଙ୍କ କୃପା ଅଛି।

ମୋଦୀ ଆହୁରି କହିଥିଲେ, ଆପଣମାନଙ୍କ ଆଶୀର୍ବାଦରୁ ମୋଦୀ ପ୍ରଧାନ ସେବକ ହୋଇପାରିଛି। ସାରା ଦେଶରେ ଏବେ ବିକାଶ ନଜର ଆସୁଛି। ଝାରସୁଗୁଡ଼ା ଏୟାରପୋର୍ଟ, ବିଛୁପାଲି ଷ୍ଟେସନ ବିକାଶର ସାକ୍ଷୀ। ଓଡ଼ିଶାରେ ଖଣିଜ, ଜଳ, ଜଙ୍ଗଲ ସବୁ ଅଛି। ତେବେ କେଉଁ କାରଣ ପାଇଁ ସମୃଦ୍ଧ ଓଡ଼ିଶା ପଛୁଆ ରହିଛି। ଏଠାରେ କେବେ କଂଗ୍ରେସ, କେବେ ନବୀନ ସରକାର ରହିଛି। କଂଗ୍ରେସ ଯାହା କରିଥିଲା, ଏବେ ବିଜେଡି ସରକାର ତାହା କରୁଛି।

କଂଗ୍ରେସ ନେତା ଏବେ ମଧ୍ୟବର୍ଗଙ୍କୁ ସ୍ବାର୍ଥପର କହିଲେଣି। ମଧ୍ୟବର୍ଗଙ୍କ ଉପରେ ଟିକସ ବୋଝ ବଢ଼ାଇବାକୁ କଂଗ୍ରେସ କହୁଛି। ଏଭଳି ଲୋକଙ୍କ ଅମାନତ ନିର୍ବାଚନରେ ଉଡ଼ାଇ ଦିଅନ୍ତୁ ବୋଲି ମୋଦୀ ଜନସାଧାରଣଙ୍କୁ ଆହ୍ବାନ କରିଥିଲେ।

ଏ ନିର୍ବାଚନ ସ୍ପଷ୍ଟ କରିବ ଚୌକିଦାର ରହିବ ନା ଭ୍ରଷ୍ଟାଚାରୀ ରହିବେ:-

ମୋଦୀ କହିଥିଲେ, ଦିଲ୍ଲୀରେ ମଜବୁର ସରକାର ପାଇଁ ମହାମିଳନ ଚାଲିଛି। ଆପଣଙ୍କୁ ମଜବୁର ସରକାର ଦରକାର ନା ମଜଭୁତ ସରକାର ଦରକାର। ଓଡ଼ିଶାରେ ବି ଏକ ମଜଭୁତ ସରକାର ଆସିବା ଦରକାର। ଏଠି ପିଇବା ପାଣି ମିଳୁଛି ନା ଚାଷ ଜମିକୁ ପାଣି ଟିକେ ମିଳୁଛି। ଏଠିକା ଯୁବକମାନଙ୍କୁ କାମଧନ୍ଦା ପାଇଁ ଦିଲ୍ଲୀ, ସୁରଟ ଯିବାକୁ ପଡୁଛି। ୧୯ ବର୍ଷ ଧରି ଯାହାକୁ ଆପଣ ବିଶ୍ଵାସ କଲେ ସେ କିଛି କଲାନି। ଓଡ଼ିଶା ସରକାରଙ୍କ ଅବହେଳା ଯୋଗୁ ଆପଣଙ୍କୁ ସୁବିଧା ମିଳୁନାହିଁ। ଏଥର ଡବଲ ଇଞ୍ଜିନ ଲାଗିଲେ ବିକାଶର ନୂଆ ଧାରା ଲାଗିବ। ଏଠାରେ ପର୍ଯ୍ୟଟନର ପର୍ଯ୍ୟାପ୍ତ ସୁଯୋଗ ରହିଛି। ଆପଣଙ୍କ ପାଇଁ ଜନଧନରୁ ବନଧନ ପର୍ଯ୍ୟନ୍ତ ବ୍ୟବସ୍ଥା ହୋଇଛି। ଏ ନିର୍ବାଚନ ନୂଆ ଓଡ଼ିଶା, ନୂଆ ଭାରତ ନିର୍ମାଣ ପାଇଁ ଉଦ୍ଦିଷ୍ଟ। ଏ ନିର୍ବାଚନ ସ୍ପଷ୍ଟ କରିବ ଚୌକିଦାର ରହିବ ନା ଭ୍ରଷ୍ଟାଚାରୀ ରହିବେ।

ଲୋକସଭା ନିର୍ବାଚନର ପ୍ରଥମ ପର୍ଯ୍ୟ।ୟ ପାଇଁ ଆଉ ମାତ୍ର ପାଞ୍ଚ ଦିନ ଥିବାବେଳେ ପ୍ରଚାର କାର୍ଯ୍ୟ ସରଗରମ ହୋଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶନିବାର ସୁନ୍ଦରଗଡ଼ ଏବଂ ସୋନ୍‍ପୁରଠାରେ ନିର୍ବାଚନୀ ସଭାରେ ଉଦ୍‍ବୋଧନ ଦେଇ କହିଛନ୍ତି, ଦେଶର ସ୍ଥିରତା ପାଇଁ ଏକ ମଜବୁତ୍‍ ସରକାର ଗଠନ କରିବା ଅନିର୍ବାର୍ଯ୍ୟ ହୋଇପଡ଼ିଛି। ପ୍ରଧାନମନ୍ତ୍ରୀ କହିଛନ୍ତି, ରାଜ୍ୟରେ ଶାସକ ବିଜେଡ଼ି ସରକାର କୃଷକମାନଙ୍କ ପାଇଁ ଆର୍ଥିକ ଅନୁଦାନ ରୂପାୟନକୁ ଅବରୋଧ କରିଛନ୍ତି ଏବଂ ଆୟୁଷ୍ମାନ୍‍ ଭାରତ ଯୋଜନାରେ ଗରିବ ଲୋକମାନଙ୍କୁ ମାଗଣା ଚିକିତ୍ସା ଯୋଗାଇବାରେ ବିଫଳ ହୋଇଛନ୍ତି।

ପ୍ରଧାନମନ୍ତ୍ରୀ ତାଙ୍କ ସରକାର କେନ୍ଦ୍ରରେ ସଂଖ୍ୟାଗରିଷ୍ଠ ସରକାର ଗଠନ କରିବେ ବୋଲି ସେ ଦୃଢୋକ୍ତି ପ୍ରକାଶ କରିଛନ୍ତି। ପ୍ରଧାନମନ୍ତ୍ରୀ ମୋଦୀ କହିଛନ୍ତି, କଂଗ୍ରେସ ଓ ବିଜେଡ଼ି ଦାରିଦ୍ର୍ୟକୁ ନେଇ ରାଜନୀତି କରୁଛନ୍ତି। ସେ କହିଛନ୍ତି, ଦେଶର ଲୋକମାନେ ମୋଦି ସରକାରଙ୍କୁ ବିଶ୍ୱାସ କରନ୍ତି କାରଣ ତାଙ୍କ ସରକାର ମହିଳାମାନଙ୍କୁ ମାଗଣା ଏଲ୍‍.ପି.ଜି. କନେକ୍‍ସନ୍‍ ଓ ଗରିବ ଲୋକମାନଙ୍କୁ ମାଗଣା ବିଦ୍ୟୁତ୍‍ ଯୋଗାଇ ଦେଇଛନ୍ତି।

ପଶ୍ଚିମବଙ୍ଗର ୪ ପୁଲିସ ଅଧିକାରୀଙ୍କ ବଦଳି ନେଇ ମୁଖ୍ୟମନ୍ତ୍ରୀ ମମତା ବାନାର୍ଜୀ କରିଥିବା ଅଭିଯୋଗର କଡ଼ା ଜବାବ ଦେଇଛନ୍ତି ନିର୍ବାଚନ କମିସନ୍‌ (ଇସି)। ଅଯଥାରେ ଅଭିଯୋଗ ନ କରିବାକୁ ନିର୍ବାଚନ କମିସନ୍ ମମତାଙ୍କୁ କହିଛନ୍ତି। ଇସିଙ୍କ ପକ୍ଷରୁ କୁହାଯାଇଛି, ନିର୍ବାଚନକୁ ଦୃଷ୍ଟିରେ ରଖି କମିସନ୍‌ ସବୁବେଳେ ନିରପେକ୍ଷତା ଅବଲମ୍ବନ କରି ଆସିଛନ୍ତି।

ଶୁକ୍ରବାର ପଶ୍ଚିମବଙ୍ଗର ୪ ପୁଲିସ ଅଧିକାରୀଙ୍କୁ ନିର୍ବାଚନ କମିସନ ବଦଳି କରିଥିଲେ। ଏହା ପରେ ମୁଖ୍ୟମନ୍ତ୍ରୀ ମମତା ବାନାର୍ଜୀ ଅଭିଯୋଗ କରିଥିଲେ ଯେ କେନ୍ଦ୍ରର ନିର୍ଦ୍ଦେଶକ୍ରମେ ନିର୍ବାଚନ କମିସନ ଏଭଳି ପଦକ୍ଷେପ ନେଇଛନ୍ତି।

ମମତା ନିର୍ବାଚନ କମିସନଙ୍କୁ ଚିଠି ଲେଖି କହିଥିଲେ ଯେ ପୁଲିସ୍ ଅଧିକାରୀଙ୍କୁ ବଦଳି କରିବା ନିଷ୍ପତ୍ତି ଦୁର୍ଭାଗ୍ୟଜନକ। କେନ୍ଦ୍ର ସରକାରଙ୍କ ଇସାରାରେ ନିର୍ବାଚନ କମିସନ ଏପରି ବଦଳି କରୁଛନ୍ତି। ଏମିତିକି ନିର୍ବାଚନ କମିସନଙ୍କ ବିରୋଧରେ ପକ୍ଷପାତିତା ଅଭିଯୋଗ ଆଣିଥିଲେ ମମତା ବାବାର୍ଜୀ। ଏହା ସହିତ ଏହି ୪ ପୁଲିସ୍ ଅଧିକାରୀଙ୍କ ବଦଳିର ପୁନର୍ବିଚାର କରିବା ପାଇଁ ସେ ଚିଠିରେ ଉଲ୍ଲେଖ କରିଥିଲେ। ଯଦି ରାଜ୍ୟରେ ଆଇନ ବିଶୃଙ୍ଖଳା ପରିସ୍ଥିତି ସୃଷ୍ଟି ହୁଏ, ତା'ହାଲେ ସେଥିପାଇଁ ନିର୍ବାଚନ କମିସନ ଦାୟୀ ରହିବେ କି ବୋଲି ମମତା ପ୍ରଶ୍ନ କରିଥିଲେ। ବିଜେପି ନେତାଙ୍କ ଅଭିଯୋଗ ଓ ପ୍ରଧାନମନ୍ତ୍ରୀଙ୍କ ନିର୍ଦ୍ଦେଶକ୍ରମେ ନିର୍ବାଚନ କମିସନ୍ ଏପରି ନିଷ୍ପତ୍ତି ନେଇଥିବା ମମତା ଅଭିଯୋଗ କରିଛନ୍ତି।

ସେ କହିଛନ୍ତି,"ଯଦି ବିଜେପି ଭାବୁଛି, ପୁଲିସ୍‌ ଅଧିକାରୀଙ୍କୁ ବଦଳି କରି ମୋତେ ନିର୍ବାଚନ ବେଳେ ଦୁର୍ବଳ କରିଦେବ, ତା'ହେଲେ ଏହା ସଂପୂର୍ଣ୍ଣ ଭୁଲ।"

ସୂଚନାଯୋଗ୍ୟ, ଶୁକ୍ରବାର ନିର୍ବାଚନ କମିସନ କୋଲକାତା ପୁଲିସ୍‌ କମିସନର ଅନୁଜ ଶର୍ମା ଓ ବିଧାନନଗର ପୁଲିସ୍‌ କମିସନରଙ୍କ ସମେତ ୨ ଜଣ ଏସଆଇଙ୍କୁ ବଦଳି କରିଥିଲେ। ବଦଳି ହୋଇଥିବା ପୁଲିସ ଅଧିକାରୀ ମମତାଙ୍କ ଦଳୀୟ କର୍ମୀ ଭାବେ ବ୍ୟବହାର କରୁଥିବା ଅଭିଯୋଗ ହୋଇଥିଲା। ସିପିଆଇ(ଏମ୍‌) ଓ ବିଜେପି ସମେତ ଅନ୍ୟାନ୍ୟ ଦଳଗୁଡ଼ିକ ଏହି ପ୍ରସଙ୍ଗରେ ନିର୍ବାଚନ ଅଧିକାରୀଙ୍କ ପାଖରେ ଫେରାଦ ହୋଇଥିଲେ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିଦେଶ ଗସ୍ତରେ ଖର୍ଚ୍ଚ ହୋଇଛି ୪୪୩ କୋଟି ୪୦ ଲକ୍ଷ ଟଙ୍କା। ବିଗତ ୫ବର୍ଷ ମଧ୍ୟରେ ଅର୍ଥାତ ୨୦୧୪ରେ ମୋଦୀ ପ୍ରଧାନମନ୍ତ୍ରୀ ହେବା ପରଠାରୁ ୪୪ ଥର ବିଦେଶ ଗସ୍ତ କରିଛନ୍ତି। ଜଣେ ପ୍ରଧାନମନ୍ତ୍ରୀ ହିସାବରେ ମୋଦୀଙ୍କର ଏହା ସର୍ବାଧିକ ବିଦେଶ ଗସ୍ତ। ଏୟାର ଇଣ୍ଡିଆ ପକ୍ଷରୁ ମୋଦୀଙ୍କ ଗସ୍ତ ଖର୍ଚ୍ଚର ବିଲ୍‌ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟକୁ ପଠାଯାଇଛି। ତେବେ ଏଥିରେ ଆହୁରି ୫ଟି ବିଦେଶ ଗସ୍ତର ଭଡ଼ା ସାମିଲ କରାଯାଇ ନାହିଁ।

ତେବେ ମୋଦୀଙ୍କ ଗସ୍ତ ଖର୍ଚ୍ଚ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହଙ୍କଠାରୁ କମ୍‌ ରହିଛି। ମୋଦୀ ଅଧିକ ବିଦେଶ ଯାତ୍ରା କରିଥିଲେ ବି ଗସ୍ତ ଖର୍ଚ୍ଚ କମ୍‌ ରହିଛି। ୨୦୦୯ରୁ ୨୦୧୪ ମଧ୍ୟରେ ତତ୍କାଳୀନ ପ୍ରଧାନମନ୍ତ୍ରୀ ମନମୋହନ ସିଂହ ୩୮ ଥର ବିଦେଶ ଗସ୍ତ କରିଥିଲେ। ଏଥିରେ ୪୯୩ କୋଟି ୨୨ ଲକ୍ଷ ଟଙ୍କା ଖର୍ଚ୍ଚ ହୋଇଥିଲା। କିନ୍ତୁ ମୋଦୀ ୪୪ ଥର ବିଦେଶ ଗସ୍ତ କରିଥିବାବେଳେ ୫୦ କୋଟି ଟଙ୍କା କମ୍‌ ଖର୍ଚ୍ଚ ହୋଇଛି।

ମୋଦୀଙ୍କ ବାରମ୍ବାର ବିଦେଶ ଗସ୍ତକୁ ବିରୋଧୀମାନେ ଅନେକ ଥର ସମାଲୋଚନା କରିଛନ୍ତି। କିନ୍ତୁ ଏହି ଗସ୍ତ ଫଳରେ ଅନ୍ୟାନ୍ୟ ରାଷ୍ଟ୍ର ସହ ଭାରତର ସମ୍ପର୍କ ବୃଦ୍ଧି ପାଇଛି। ମୋଦୀଙ୍କ ବିଦେଶ ଗସ୍ତ ଖର୍ଚ୍ଚ ମନମୋହନଙ୍କ ତୁଳନାରେ କମ୍‌ ହେବାର କାରଣ ହେଉଛି ଗୋଟିଏ ଟିକେଟରେ ଦୁଇଟି ଯାତ୍ରା କରିବା। ମୋଦୀ ଗୋଟିଏ ଗସ୍ତ ସମୟରେ ଏକାଧିକ ଦେଶକୁ ଯାତ୍ରା କରିଥାନ୍ତି। ଏହା ଦ୍ବାରା ଖର୍ଚ୍ଚ କମ୍‌ ହୋଇଥାଏ।

ପାରଳାଖେମୁଣ୍ଡି : ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହ ଆଜି ଦିନିକିଆ ଓଡ଼ିଶା ଗସ୍ତରେ ଆସି ଗଜପତି ଜିଲ୍ଲାର ପାରଳାଖେମୁଣ୍ଡି କାଶୀନଗର ବ୍ଲକର ସିଦ୍ଧାବଡ଼ଙ୍ଗା ପଡ଼ିଆରେ ଆୟୋଜିତ ବିଜୟ ସଂକଳ୍ପ ସମାବେଶରେ ଯୋଗଦେଇ କହିଛନ୍ତି ଯେ ଉତ୍କଳ ଦିବସରେ ସେ ଏଠାକୁ ଆସିଥିବାରୁ ନିଜକୁ ସୌଭାଗ୍ୟଶାଳୀ ମନେ କରୁଛି।

ସେ ଆହୁରି କହିଛନ୍ତି '୧୯ ବର୍ଷ ହେବ ଧରି ନବୀନ ବାବୁ ଓଡ଼ିଆ ଭାଷା କହିପାରୁ ନାହାନ୍ତି। ଏଭଳି ଜଣେ ମୁଖ୍ୟମନ୍ତ୍ରୀ ନିର୍ବାଚିତ କରନ୍ତୁ ଯିଏ ଓଡ଼ିଆ ଭାଷା କହିପାରୁଥିବ।' ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହ ଆହୁରି କହିଛନ୍ତି ଯେ ସେ ସାରା ଦେଶ ଭ୍ରମଣ କରୁଛନ୍ତି ,ସମସ୍ତେ କହୁଛନ୍ତି ପୁଣି ଥରେ ନରେନ୍ଦ୍ର ମୋଦୀ କ୍ଷମତାକୁ ଆସିବେ। ନବୀନବାବୁଙ୍କ ସରକାରକୁ ଓପାଡ଼ି ଫିଙ୍ଗିବାକୁ ସେ ଆହ୍ଵାନ ଦେଇଛନ୍ତି। ନବୀନ ପଟ୍ଟନାୟକ

ଏହି ସଭାରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ,ବ୍ରହ୍ମପୁର ବିଜେପି ଲୋକସଭା ପ୍ରାର୍ଥୀ, ନବରଙ୍ଗପୁରବିଜେପି ଲୋକସଭା ପ୍ରାର୍ଥୀ ଜୟରାମ ପାଙ୍ଗୀ ଏବଂ ରାଷ୍ଟ୍ରୀୟ ଉପସଭାପତି ବୈଜୟନ୍ତ ପଣ୍ଡା ପ୍ରମୁଖ ଉପସ୍ଥିତ ଅଛନ୍ତି।

ଉମରକୋଟ, ଏପ୍ରିଲ ୦୧ :

ଭାରତୀୟ ଜନତା ପାର୍ଟି ଦିଲ୍ଲୀ ଓ ଓଡିଶାରେ ହେଲେ କୃଷିଜାତ ଶିଳ୍ପର ପେଣ୍ଠସ୍ଥଳ ନବରଙ୍ଗପୁର ହେବ । ଏଠାରେ ମକା ଆଧାରିତ ଶିଳ୍ପ ପାଇଁ କାରଖାନା ତିଆରି କରାଯିବ । ବୈକଳ୍ପିକ ପଦ୍ଧତିରେ ମକାରୁ ପେଟ୍ରୋଲ ଓ ଡିଜେଲ ବାହାର କରାଯିବ । ନବରଙ୍ଗପୁର ଜିଲ୍ଲା ପେଟ୍ରୋଲ ଓ ଡିଜେଲର ଆବଶ୍ୟକତାକୁ ପୂରଣ କରିବ । ଜିଲ୍ଲାର ଆଦିବାସୀ, ଚାଷୀ, ପଛୁଆ ବର୍ଗର ଲୋକମାନେ ଏଠାରେ ମକା ଉତ୍ପାଦିତ କରି ପେଟ୍ରୋଲ ଡିଜେଲ ତିଆରି କରିବେ । ଫଳରେ ନବରଙ୍ଗପୁରରେ ଶିଳ୍ପ ପ୍ରତିଷ୍ଠା ପାଇଁ ପୁଞ୍ଜି ଆସିବ ଏବଂ ଏହାଦ୍ୱାରା ଜିଲ୍ଲାରେ ରୋଜଗାର ବଢିବ ଏବଂ ସ୍ଥାନୀୟ ଅର୍ଥନୀତି ବିକଶିତ ହୋଇପାରିବ । ଏଥିପାଇଁ ନବରଙ୍ଗପୁରବାସୀଙ୍କ ନରେନ୍ଦ୍ର ମୋଦୀଙ୍କୁ ପ୍ରତି ଆଶୀର୍ବାଦ ରହିବା ଦରକାର ବୋଲି ଆହ୍ୱାନ କରିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ସେହିପରି ବିଜେପି ସରକାରକୁ ଆସିଲେ ଆଗାମୀ ୫ ବର୍ଷରେ ନବରଙ୍ଗପୁର ଜିଲ୍ଲାରେ ଏକ ବିଶେଷ କମିଶନ ବସାଇ ଗରିବ ଲୋକଙ୍କୁ ପଟ୍ଟାଯୁକ୍ତ ଜମି, ଘରଡିହ ସହ ପକ୍କା ଘର ଦିଆଯିବ ବୋଲି ଧର୍ମେନ୍ଦ୍ର ପ୍ରଧାନ କହିଛନ୍ତି ।

ନବରଙ୍ଗପୁର ଜିଲ୍ଲା ଉମରକୋଟରେ ବିଜେପିର ବିଜୟ ସଂକଳ୍ପ ସଭାରେ ପବିତ୍ର ଉକ୍ରଳ ଦିବସକୁ ସ୍ୱାଗତ ଜଣାଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି ୧୯୩୬ ମସିହାରେ ଓଡିଶା ଦେଶର ପ୍ରଥମ ଭାଷାଭିତିକ ରାଜ୍ୟ ଭାବେ ଜନ୍ମ ନେଇଥିଲା । ଗତ ୨୯ ତାରିଖରେ ଦେଶର ଲୋକପ୍ରିୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶହୀଦ ଲଖ୍ମଣ ନାୟକଙ୍କର ବଳିଦାନ ଦିବସରେ କୋରାପୁଟର ଜୟପୁରକୁ ଆସିଥିବା ବେଳେ ନୂଆ ଭାରତ, ନୂଆ ଓଡିଶା ତଥା ଓଡିଶା ଓ ଦିଲ୍ଲୀରେ ଡବଲ ଇଞ୍ଜିନ ସରକାର ଲଗାଇବା ପାଇଁ ପ୍ରଧାନମନ୍ତ୍ରୀଙ୍କ ଆହ୍ୱାନକୁ ଉମୋରକୋଟରେ ପହଁଚାଇବା ପାଇଁ ଆଜି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହ ଓଡିଶା ଆସିଛନ୍ତି ବୋଲି ସେ କହିଛନ୍ତିା

ଅତୀତରେ ଅନେକ ଭାରତର ପ୍ରଧାନମନ୍ତ୍ରୀ ଭାବରେ ଦାୟିତ୍ୱରେ ଥିଲେ ମଧ୍ୟ କେହି ଗରିବ ମା' ଭଉଣୀମାନଙ୍କ ଆଖିରୁ ଲୁହ ପୋଛିବାର ଯୋଜନା କରିନଥିଲେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦିଲ୍ଲୀର ଟ୍ରେଜେରୀରୁ ଟଙ୍କା ଆଣି ନବରଙ୍ଗପୁରର ମା' ଭଉଣୀଙ୍କ ପାଇଁ ଏଲପିଜି ଗ୍ୟାସ ଚୂଲା ପଠାଇଲେ, ଗରିବ ମହିଳାଙ୍କ ପାଇଁ ଇଜ୍ଜତ ଘରସ୍ୱରୂପ ଶୌଚାଳୟ ନିର୍ମାଣ କଲେ, ପ୍ରଧାନମନ୍ତ୍ରୀ ଆବାସ ଯୋଜନାରେ ଗରିବଙ୍କ ମୁଣ୍ଡ ଉପରେ ପକ୍କା ଘର ଦେବା କଥା ଭାବିଲେ, ଘରକୁ ବିଜୁଳି ପହଁଚାଇବା ସହ ଗରିବଙ୍କ ଚିକିତ୍ସା ପାଇଁ ଆୟୁଷ୍ମାନ ଯୋଜନା କଲେ । ଏହା ସହ ଚାଷୀଙ୍କ ପାଇଁ ପିଏମ କିଷାନ ଯୋଜନା ଓ ଶ୍ରମିକଙ୍କ ପାଇଁ ଶ୍ରମଯୋଗୀ ଯୋଜନା କଲେ । ମୋଦିଙ୍କ ମୂଳ କେନ୍ଦ୍ର ଗରିବ କଲ୍ୟାଣ ଥିଲା ବୋଲି ସେ କହିଛନ୍ତି ।

ଧର୍ମେନ୍ଦ୍ର ପ୍ରଧାନ ଆହୁରି କହିଛନ୍ତି ଯେ ଦେଶର ୧୧୫ଟି ଜିଲ୍ଲାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆକାଂକ୍ଷା ଜିଲ୍ଲା ଭାବେ ନିଜେ ତଦାରଖ କରୁଛନ୍ତି । ପ୍ରତି ମାସରେ ନବରଙ୍ଗପୁର ଜିଲ୍ଲାର ତଦାରଖ କରି ଏ ଜିଲ୍ଲାର ବିକାଶର କଥା ଚିନ୍ତା କରନ୍ତି । ଅନ୍ୟପଟେ ଓଡିଶାର ମୁଖ୍ୟମନ୍ତ୍ରୀ ଉମରକୋଟର ଗାଁମାନଙ୍କୁ ଯାଇ ଲୋକଙ୍କ ସୁଖ ଦୁଃଖ କଥା ବୁଝିଛନ୍ତି କି ବୋଲି ଶ୍ରୀ ପ୍ରଧାନ ପ୍ରଶ୍ନ କରିଛନ୍ତି । ଲୋକଙ୍କ ସୁଖ ଦୁଃଖରେ ଠିଆ ହେଉଥିବା ଲୋକକୁ ହିଁ ସରକାର କୁହାଯିବ । ସେ ଯେ ରାଜ୍ୟରେ ବିଧାନସଭା ନିର୍ବାଚନ ହେବାକୁ ଥିବା ବେଳେ ରାଜ୍ୟରେ ୧୯ ବର୍ଷର କୁଶାସନ, ଅତ୍ୟାଚାରୀ, ନାରୀ, ଯୁବ, କୃଷକ, ଆଦିବାସୀ, ଦଳିତ ଓ ପଛୁଆ ବର୍ଗର ବିରୋଧୀ ଶାସନ ଚାଲିଛି । ଏହାକୁ ବଦଳେଇବାର ସମୟ ଆସିଛି । ଗୋଟିଏ ପଟେ ୧୯ ବର୍ଷ ଶାସନର ଅବ୍ୟବସ୍ଥା ଓ ଆଉ ଗୋଟିଏ ପଟେ ୫ ବର୍ଷର କଲ୍ୟାଣକାରୀ ଯୋଜନାର ଶାସନ । ଧର୍ମେନ୍ଦ୍ରପ୍ରଧାନ କହିଛନ୍ତି ଯେ ଓଡିଶାର କୁଶାସନକୁ ବଦଳେଇବା ଦରକାର ।

ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ ଏ ଅଂଚଳର ଯୁବକ କାମ ପାଇଁ ବାହାରକୁ ଯାଉଛି । ଏ ଅଂଚଳରେ କାମ ସୃଷ୍ଟିରେ ହେବା ଦରକାର । ନିଜ ଜିଲ୍ଲାର ଲୋକଙ୍କୁ କାମ ଦେଇ ଅନ୍ୟ ସବୁ ଜିଲ୍ଲାର ଲୋକଙ୍କୁ କାମ ଦେବାର ସମ୍ଭାବନା ନବରଙ୍ଗପୁର ପାଖରେ ଅଛି । ସେହିପରି ଓଡିଶା ଓ ଦିଲ୍ଲୀରେ ମୋଦିଙ୍କ ଡବଲ ଇଞ୍ଜିନ ଲାଗିଲେ ଗରିବଙ୍କ ପାଇଁ ଆସୁଥିବା ଟଙ୍କା ବିଜୁ ଜନତା ଦଳର ଦଲାଲାମାନଙ୍କ ପକେଟକୁ ଯିବନାହିଁ ବୋଲି ସେ କହିଛନ୍ତି ।